SOLID! er tilbake med si sjette utgiving, «Firm Deadline», oppfølgaren til Woodworks frå 2021, og denne gongen tek dei med seg saksofonist John Ellis frå New York til Kadaver.

I likskap med "Woodworks" har trioen igjen invitert Ellis for å setje sitt særpreg på musikken. Ellis har jobba med namn som Robert Glasper, Norah Jones, Lonnie Smith, Brian Blade, Sting, Charlie Hunter og Marsalis-familien, og det er ikkje ofte vi får musikarar av dette kaliberet på klubbscene i Noreg. Dette blir jazz i verdsklasse, rett her hos oss.

Med eit sjølverklært behov for fristar for «å få noko som helst gjort», sette gitarist Bjørn Vidar Solli ein firm deadline for seg sjølv i februar 2023. Studio vart booka og betalt, flyreiser kjøpte, og plutseleg fanst det ein frist det var umogleg å kome unna. «Perfekt for å få kreativiteten i gang», ifølgje Solli.

Resultatet vart åtte nye komposisjonar som SOLID! først testa ut på turné i Noreg med Ellis, før dei gjekk i studio i Trondheim. Musikken vart komponert i Lier, spelt inn i Trondheim, miksa og mastret i Brooklyn, og er no klar for å delast live.

SOLID! har eksistert i over 20 år, og med så lang fartstid saman skriv bandet musikk som er skreddarsydd for musikarane, med rom for både energi, improvisasjon og samspel.

Musikarar:
Bjørn Vidar Solli - gitar
Daniel Buner Formo - orgel
Håkon Mjåset Johansen - trommer
John Ellis - sax

Det er ope for å ete middag før konserten, med begrensa meny og antal plasser.

Dører: 18:00
Konsertstart: 20:00
Billett: 300,-