No soli bakom blåe fjell - Blix i ny tolking

For 150 år sidan gav Elias Blix ut dei første nynorske salmene i heftet «Nokre Salmar, gamle og nye.» I november blir det feira med ei moderne tolking levert av musikarar og formidlarar frå øvste hylle: Marte Eberson, Mats Eilertsen, Siv Øyunn Kjenstad, Tore Brunborg og Frank Kjosås!

– Salmane til Blix har vore høgt elska, og mange av dei er framleis nokre av dei mest populære i dag, seier Brunborg og nemner kjende salmar som «Med Jesus vil eg fara», «Syng i stille morgonstunder» og «No livnar det i lundar». – Men publikum kan også vente seg nokre vakre melodiar som ikkje er like kjende i vår tid, seier han. Både kjende folketonar og melodiar av komponistar som Ludvig M. Lindeman har blitt brukt til å tonesetje tekstane til Blix.

Ensemblet er ei spennande samansetjing av norske musikarar med eit breitt spekter av erfaringar og prosjekt bak seg. Den vesle vestlandsturnèen går til Volda, Jølster og Ulvik og er utvikla av Nynorsk kultursentrum og Svidal skriveri.

Konserten på Jølster er eit samarbeid mellom Kyrkjene i Jølster, Jølster bibliotek, Jølster jazzklubb og Rom for ord.