KOM PÅ KOMBI-KONSERT PÅ AVDEMSBUE!
For dei fleste er Avdemsbue kjent for gourmet-mat, men denne oktobersøndagen blir det òg servert delikat og velsmakande musikk, når JO SVERRE og SIGURD BRØRS slår kreftene sine saman og kokar i hop ein kombi-konsert. Dei vil kjøre kvart sitt sett, men ryktet går om at dei òg skal hjelpe einannan på nokre nummer.
Sigurd Brørs bur på Dombås og Jo Sverre (Sande) bur i Trondheim, så vi snakkar dels kortreist, dels mellomlangreist musikk. Men elles har dei to «servitørane» fleire ting felles: Båe er opprinneleg nordmøringar, båe har skibakgrunn, båe blir hylla for låtskrivarkunstene sine, båe bytta ut engelske tekstar med norske for nokre år sidan, båe har bakgrunn i popband, men mestrar òg det nedstrippa akustiske formatet. Dessutan likar båe å prate mellom songane sine, så det bør bli ein triveleg kveld på Lesja.
- - - - - - - - - - - - - - - -
OM ARTISTANE
Visepopsongaren JO SVERRE kjem frå Rindal på Nordmøre og er kanskje ein av Norges mest kjente, ukjente artistar. Med hundrevis av konsertar og eit tosifra antal låtar lista på NRK P1 og P3, er sjansen stor for at du har høyrt musikken hans, deriblant radiohitane «Ka Om», «Takka fer det oss ha fått» og «Luftslott».
Han er no aktuell med sitt andre album, «Sommå ka så skje». Dei melodiøse låtane funkar like bra med fullt band som i det intime soloformatet vi får servert på Avdemsbue. Med lun humor og inderlege tekstar vil Jo Sverre by opp til både allsong og refleksjon.
Sjå «Luftslott» m/ Sigmund Groven på YouTube: youtu.be/2BfE9e2o29c
Pressa seier:
::: Kvalitetspop med refrenger som lurer seg uunngåelig inn i hjernen. – Adresseavisen
::: «Ka Om» er et mesterverk av ei låt. – Littnytt.no
::: Jo Sverres andre album er nok et bevis på et betydelig låtskrivertalent. – Ole Jakob Hoel/Adresseavisen gir terningkast 5 til «Sommå ka så skje»
- - - - - - - - - - - - - - - -
SIGURD BRØRS kjem frå nabobygda Surnadal, men gjorde i 2021 dombæsing av seg. I 2023 har han markert seg lokalt med songane «Fjell og vilje - sunge i lag med Martine Haugen – og «Urd» – framført i lag med Bjørn Sigurd Glorvigen under inviinga av utsiktspunket Rullesteinen 18. august.
Frå før har Sigurd 20 års fartstid som låtskrivar og frontmann i dei rocka pop-banda Karl Barx og The Brørs. Han har laga fleire hundre songar, og på Avdemsbue får du høyre både gamle og nye, alle i akustisk drakt.
Sigurd er òg grafisk designar og lagar musikkvideoane sine sjølv. Og så laga han faktisk omslaget på plata som Jo Sverre gav ut med sitt første band, Swiks, attende i 2013.
Sjekk ut spelelista «Musikk og video: Sigurd Brørs» på YouTube:
bit.ly/musikk-og-video-sigurd-broers
Pressa seier:
::: Botheim kom akkurat denne helgen med Hjerkinn-romanen «Høgfjellsmeldinga» – og det er i anledning boka at denne lekre lille låten er utgitt. Vi hører gjerne mer bygdepop fra denne gjengen.
– Ole Jakob Hoel/Adresseavisen om «Fjell og vilje»
::: Med sin lune, humoristiske og særegne opptreden, og kledd i Felleskjøpet-caps med matchande gul T-skjorte og grøn bukse med kassegitaren klar, fanga Brørs publikum og satte standaren frå første sekund.»
– Trollheimsporten.no om konsert under Vårsøghelga 2023.
- - - - - - - - - - - - - - - -
Spesiell gjest, forfattaren GURI SØRUMGÅRD BOTHEIM, er gift med Sigurd. I mars 2023 gav ho ut romanen «Høgfjellsmeldinga», til svært god mottaking. Sigurd laga omslaget til boka, og dei to samarbeidde om teksten til «Fjell og vilje».
Men – visste du at Jo Sverre òg dukkar opp i romanteksten? CD-en «E» blir spela på bilstereoen under ein tur gjennom Drivdalen! Så det finst mange forbindelseslinjer som kan bli utforska når Jo Sverre, Sigurd og Guri møtest på Avdemsbue.
Konsertstart kl. 19. Velkomen!