Alter ego

På denne konserten får du høyre urframføring av av verket “Alter Ego” av komponist Klaus Ellerhusen Holm, skrive til gitarist Lars Ove Fossheim. Lars Ove Stene Fossheim er gitarist og komponist busett i Volda, og verket er ein del av hans mangeårige utforsking av el-gitaren si rolle og betyding i samtidsmusikken. I denne konserten har han også med seg den anerkjende samtidskvartetten Tøyen fil og klafferi. Dei kjenner kvarandre godt og deler nysgjerrigheita for nyskapande lyd og samklang.

Du får høyre:
*“Melting Winter” av Roberta Lazo Valenzuela
*improvisasjon av Tøyen fil og klafferi og Lars Ove Fossheim
*URFRAMFØRING av verket “Aleter ego” av Klaus Holm, spelt av Lars Ove Fossheim

Tittelen “Alter Ego” tyder “anna eg”, eller ein avløysar som i tankegang, ein åndeleg dobbeltgjengar. Ideen bak stykket er at Lars Ove skal fungere som sin eigen dobbeltgjengar, der den eine heile tida ligg litt framføre eller bak den andre. Dette kjem også til uttrykk i at han spelar på to el-gitarar vekselvis. Den eine gitaren er stemt ned ein åttedels tone medan den andre har vanleg stemming for å skilje dei to litt frå kverandre. Materialet i stykket kjem frå ei rekke solo-improvisasjonar av Lars Ove Fossheim som vart spelt inn i 2023, nokre av improvisasjonane hadde spesifikke instruksjonar, andre hadde det ikkje. Materialet har i etterkant vorte redusert og organisert saman med idéar og materiale frå komponisten.

Klaus Ellerhusen Holm er ein norsk komponist og musikar busett i Trondheim. Han jobbar innanfor samtidsmusikk, improvisert musikk og dei ytre områda av jazzfeltet, og han føler seg heime i fleire ulike settingar innanfor dette miljøet. Han er også tilsett ved Institutt for musikk, jazzlina, der han underviser i komposisjon, saksofon og klarinett hovudinstrument.