PILEGRIMSFERD, Herøy-Moltustranda-Gjerdsvika-Brekkegarden-Herøy

Velkomen til pilegrimsferd med jektetur og vandring i Herøy og Sande på Søre Sunnmøre laurdag 5. oktober!

PROGRAM:
9.00 Oppmøte Herøy gard
9.30 Avgang med jekta frå Herøy gard
9.50 Ankomst Moltustranda
10.00 Vandring frå Moltustranda til Gjerdsvika
13.00 Arrangement på Brekkegarden
14.30 Vandring frå Brekkegarden til Moloen i Gjerdsvika
15.00 Avgang med jekta frå Gjerdsvika
16.00 Ankomst Herøy gard

Fyrste del av turen går med sunnmørsjekta "ANNA OLAVA" frå Herøy gard til Moltustranda. Båten er ein kopi av ei jekt slik dei såg ut på Sunnmøre på 1700-1800 talet, og har plass til 22 passasjerar. Turen tek ca. 20. min.

Frå Moltustranda VANDRAR vi til fots over fjellet til Gjerdsvika, via Sædalen. Turen går på gruslagd veg, er om lag 15 kilometer og passar for deg som er i alminneleg god form. Det er sett av 3 timar til turen.
Det er mogleg å fylgje sunnmørsjekta "Anna Olava" direkte til Gjerdsvika for dei som ynskjer det.

På fredelege Brekkegarden vert vandrande og andre besøkande ynskt velkomen av vertskapet, og det vert moglegheit til å kjøpe MAT & DRIKKE. Denne dagen vert det servert brennsnut, vaflar og kaffi/te.
I eit av hageromma kan det vente ei lita overrasking til slitne pilegrimar. Vi rundar av stunda på Brekkegarden i Rosehagen, der sokneprest i Herøy, Solfrid Leinebø Seljås, vil leie ei kort PILEGRIMSSAMLING.
Arrangementet på Brekkegarden er OPE FOR ALLE.

Pilegrimane som deltek på jekteturen med "Anna Olava" VANDRAR frå Brekkegarden til moloen i Gjerdsvika, og reiser vidare med jekta tilbake til Herøy gard. Vandringa tek ca. 30 minutt og båtturen tek ca. 1 time.

Vi tek forbehold om å gjennomføre jekteturen dersom vêr og føre ikkje tillet det. Turen vil då verte gjennomført med anna transport.

- - - - - - - - -

Brekkegarden er ei fredeleg og vakker litt bortgøymd perle i Gjerdsvika som verkeleg er verdt eit besøk! Staden inviterar til vandring i gamalt kulturlandskap, grønt og frodig, og med elva som sildrar rett forbi.
Les meir på: nakuhelsunnmore.no