Velkomne til konsert med STEMT i Konsertsalen på Kaarstadhuset tysdag 2. juni kl. 20. Dørene opnar kl. 19. Barn under 12 år har gratis inngong.

Denne våren har STEMT øvd inn eit repertoar som er den svenske ´midsommarafton´ verdig. Med eit godt knippe kjende, svenske viser (m.a. Evert Taube, Cornelis Vreesvijk, Astrid Lindgren) og svenske folkesongar (Hans Kennemark, Greger Siljebo) på programmet, ligg alt til rette for å leve seg inn i den lyse, nordiske sommarnatta. Her blir det kjærleik: ung og gamal, nyutsprungen og livslang. Det blir skjærgård, sjø og segling, med meir eller mindre heldige sjømenn (eller kvinner) bak roret. Det blir også nokre turar ut i den grøne naturen, med duftande blomar, yrande dyreliv og ein og annan Mattisrøvar snikande mellom furutreda.


Idéen om å tre inn i det svenske repertoaret, kom til i samarbeid med felespelar Leiv Arne Nydal. Nydal var med på STEMT sin jubileumskonsert i november 2025, og han likte det han høyrde. Sjølv vart han introdusert for den svenske folkemusikken, og riksspelemannen Hans Kennemark sine komposisjonar, gjennom sitt venskap med den svenske spelmannen Sture Göransson. Nydal har spelt mange gode slåttar frå det svenske repertoaret gjennom åra, men dette er første gong han har fått moglegheit til å framføre stoffet akustisk saman med kor og band. Bandet består i sin heilskap av Leiv Arne Nydal på fele, Robert Løkketangen på gitar og Øyvind Espe på kontrabass.


Blandakoret STEMT, med base i Ørsta og Volda, markerte 10 år hausten 2025. Det er eit kor i stadig utvikling, med stabile, røynde songarar og kvalitetsbevisst jobbing mot nye mål. Med sin dyktige dirigent Siv Kristin Aurdal i spissen, har koret hausta mange lovord dei siste åra. Særleg for sin særeigne klang og uttrykk.