Astrid Garmo - Sleppkonsert // Kafé Hærverk

Felespelaren Astrid Garmo kjem ifrå Garmo i Gudbrandsdalen, og jobbar for tida som frilansmusikar med base i Oslo. I tillegg til å ha føtene godt planta i flatfelemusikken fra heimtraktane, har Astrid også dei siste åra vore ein svært aktiv hardingfelespelar, og ho fordjupa spesielt seg i folkemusikken frå Valdres, Hallingdal og Telemark da ho studerte på Norges Musikkhøgskole i åra 2016-2020. I dag er ho leiar for Bærum Spellemannslag, spelar mykje til dans og er aktiv i grupper på tvers av sjangrar med forskjellige instrument som til dømes feler, gitar, synth og langeleik. Ho er å høyre i folkemusikkorienterte prosjekt som blant anna Pumpegris, Dålågjel, Ester og Astrid og LIN, men også som gitarist og vokalist i indie-banda Clowder, Scoreboard og acting emma.


I juni 2024 gav ho ut plata «Sjugurd», ei utgjeving med slåttar etter oldefaren, Sjugurd Garmo. Sjugurd levde sitt liv i Garmo, ei grend øvst i Gudbrandsdalen som gardbrukar og spelemann. Han dreiv garden Uppigard Garmo, der han voks opp saman med mor si, bestemor og 3 tanter. Mor hans spelte trekkspel og Uppigard var ofte ein samlingstad for folk og musikk. Sjugurd Garmo gav frå seg garden til eldstesonen, Sigmund, omkring 1950. Etter den tida var han og kona Helene budeier på setra i Kleppdalen. Opphalda på Uppigardssetra i Kleppdalen vart produktive år som komponist. Han var særs glad i dyr, fjell og natur, og dette gav mykje inspirasjon til slåttane hans. Han meinte at han høyrde melodiar i naturen rundt seg, og komponerte ofte medan han gjekk i fjellet, noko ein høyrer ein i vemodet i musikken hans. Han komponerte både gammaldans- og bygdedansmusikk, og skreiv spesielt mange springleikar. Opp mot 50 slåttar er signert Sjugurd som er kjende for sitt tradisjonelle, men samstundes nytenkande særpreg.


På denne sleppkonserten vil Astrid spele slåttar frå skiva, samt nokre andre favorittar på fele og hardingfele.

--

ID: 20
CC: 200,-/150,- (student)